Мамлакатимизда Олий аттестация комиссияси томонидан докторлик диссертацияларининг асосий илмий натижаларини чоп этиш тавсия этилган илмий нашрлардан бири бўлмиш  Прогнозлаштириш ва макроиқтисодий тадқиқотлар институтининг “Iqtisodiyot: tahlillar va prognozlar” журнали Россиянинг Илмий иқтибос индекси (РИНЦ) рўйхатига киритилди.

Айни пайтда  журнал жамоаси  рейтинги  юқори хорижий  илмий журналлар  билан алоқаларни йўлга қўймоқда. Масалан,  Россия Илмий иқтибос рўйхатига кирганимиз боис  бизда чоп этилган мақолаларни эндиликда 6000 дан ортиқ рус журналларидан фойдаланувчи олим ва мутахассислар ҳам кўриб бориши мумкин бўлди.   Айни вақтда  журналда эълон қилинган  мақолалар билан  узоқ хориж илмий  масканлари олимлари ҳам  танишиб бориши чоралари кўрилмоқда.

Шуни ҳисобга олиб, ушбу журналда мақола чоп этмоқчи бўлган муаллифлардан мақолаларини рейтинги юқори хорижий журналлар талабларига мувофиқ мазмун ва шаклда тайёрлаши сўралмоқда. Яъни  илмий ва амалий нуқтаи назардан долзарб  бўлиши, мавзунинг ёки унинг очиб берилишининг янгилиги,    матн аниқ ва равон баён этилиши  лозим.

Мақолада  мавзу ёки муаммо бўйича  чуқур таҳлил қилиш, бу борада йўл қўйилган  хато ва камчиликларни аниқ кўрсатиб бериш,  муаммони бартараф этиш бўйича асосланган хулоса ва  таклифлар тайёрлаш тавсия этилади. Унда    илмий янгилик албатта бўлиши ёки мавжуд муаммони ҳал этиш бўйича муаллиф янгича ёндашувлардан фойдаланиши мақсадга мувофиқ.

Мақолаларни электрон почта info@ifmr.uz орқали ҳам юборишингиз мумкин.